Plateliu krašta patarlės ė priežuodē

Padarīk moni žėnontio, vo aš tavi – baguoto.
Barzduos rieti priskotā, vo pruota neigavā.
Matuomo vėrbo sau akis krioš.
Par neminta muoli daug varga kėntiesi.
Kas nekeravuo papėntė, nustuo ė kepala.
Ka ė dėdėlis, vo ka nepalekos.
Kas tas do paukštis, ka sava plunksnu nepaneš?
Sokėla kap viežē prīš perkūnėjė.
Kap ėš akiu, tēp ėr ėš atmintėis.
Palėjės potras nebsolaižīsi.

Plateliū–Babrunga apīlinkies 1939 metās ožrašė Brutienis Zėduorios

Beržoriškės Julijos Gadeikytės užrašytos mįslės, patarlės, priežodžiai:

Jouda vėšta ont rauduonas kiaušes top. (Katėls ont ognėis)

Pėlns tvarts raudonūm karviu, vėina jouda iejė, vėsas ėšmaišė. (Žarsteklis pečiou)

Be snapa, be kakla, vuo gėid. (Perdals)

Je neoždėrba saulieteki, saulielīdie nabnuoriek.

Je neaštros peilis, ī sakuoma, gal ont anuo raits juotė.

Ons ne tuo medė šaukšts.

Ne tuo medė bėrbīnė (netor balsa).

Po pėitu šaukštu nier (apsėženėjus negal ėšsėskėrtė).

Nė Dievou žvakė, nė biesam pečšloustė.

Pasėlėnk, galvuos neprasėdauši.

Išējė ežīs mėiliu (ka ėlgā negrīžt).

Nosėgonda, kāp žemaitis tievėškė pardavės.

Svetėma lėga pėrštu maišuoma.

Žovis ė svetīs tretė dėina dvuok.

Ėš kaktuos svėista nesoksi.

Kas ėš tuos kaktuos, ka nier staktuos.

Kas tau so akmėniu, to tam so douna.

Šėndėina čia, rītuo Peterburgė. Šaukšta, bliūda sorėštė, i sobėnė sokėštė (aple tus, katrėi daug keliau).

Baguotam biesos šėk taukus i kuošė, biednam ėr ėš šėkėnės ėškabėn.

Pats kāp ežīs, pėlvs kāp krežīs.

Papėntė ėiškuodams, kepala pamesi.

Pėrkta douna peilė bėja (neskalsi).

Ėš vėsa bliūda mesuos veršė oudėga ėšsėrinka.

Kuo borgi, kāp obaga sobėnė klecku priiedosi.

Bėngies gavienė, bėngies veršė mēsa (tēp sakuoma, ka kas nuors baigas, pvz., baigas žėima, baigas kobėlė pėins).

Je nesmėrdies po stalo, nekvepies ni ont stala (po stalo kiaulės vākščiuojė).

So šaukšto srioba, vuo so kuoto akis bada (dvėveidis žmuogos).

Švėnts Juons – pėina puons, švėnta Vuona – dounas puoni.